കർക്കിടത്തിലെ മഴ

ഉമ്മറപടിയിലേക്ക്
കാലെടുത്തുവച്ചു കരഞ്ഞു 
മുറ്റത്ത്‌ നിൽപ്പുണ്ട്‌ അവൾ 

കരഞ്ഞു കരഞ്ഞ്‌
അമ്മയെ കൂടെ 
കൊണ്ടുപോയവൾ

ഞാൻ കൂടെ ചെല്ലത്തത്തിന്റെ
പരിഭവങ്ങൾ കരഞ്ഞ്‌
തീർത്തുകൊണ്ട്

പേരിടൽ

വിരസമൌനത്തിന്റെ
പടികളിറങ്ങി ദേശാടനം
നടത്തി
തിരിച്ചെത്തും മനസിന്‌
എന്ത് പേരിടണം

ആകാശതാഴ്വരയിൽ
കൂട്ടം തെറ്റി അലയുന്ന
കുഞ്ഞാടിന് എന്ത് പേരിടണം

കുഞ്ഞുവിരലിൻ തുമ്പിൽ
തൂങ്ങി സ്ക്കൂൾ മുറ്റത്തേക്ക്
നടന്നുപോകും മഴക്കെന്തു പേരിടണം

കെട്ടി പുണർന്ന് മരചില്ലകളിൽ
ഉമ്മവെച്ച് പ്രണയിക്കുന്ന
കാറ്റിനെന്തു പേരിടണം

ചോര്ച്ചയില്ലാത്ത വീട്ടിലെ
അകത്തളത്തിൽ തോരാതെ
പെയ്യുന്ന മഴയ്ക്ക് എന്ത് പേരിടണം